www.volcreole.com

[Koutcha]

Sa ka fè nanni nannan moun ka ékri an kréyol, mé nou pa ka touvé adan libréri sé teks-la ki sòti ni senkan, dizan, ventan, trantan...
E menm an bibliotek sa pé red pou trouvé yo.

Mi an kont Laguadloup jòdijou, jédi 25 désanm 2003.

Man kité teks-la menm manniè-a yo pibliyé'y lanné 1995.
(menm présantasion, menm lotograf, menm ti défo teknik -coquilles-)
Tansion tesk-tala pa lib. I ni an met...

Aprésyé'y !

Poukisa krab pa ni tèt ?...

Zòt ka chonjé an té pwan mo èvè zòt pou té di zòt pouki krab pa ni tèt ? Onlo ja tann “ Sé twop palé i fè si krab pa ni tèt ”, men ès zòt konnèt dékatman a sa ?... Kouté pou tann !
Lè Bondyè té désidé kréyé bèt, i pa pwan tan a-y fè chak bèt yonn apwé lòt. Imajiné tibwen tan i té'é fo-y !... I kalkilé on ti moman épi i di an kyè a-y : “ An ké fè chak pa pil : enpé kò, enpé tèt, enpé pat, enpé kyé... é an ké voyé opiyaj ba yo, sa i vlé ké pwan... ”
Konmdifèt, Bondyé voyé sé pat bèt-la douvan-y. I di yo :
- Mi enpé pat ! Lésèz i vlé, poté mannèv, ay pwan !
Tout bèt pati alakous kon yo té pé, yo varé si sé pat-la. Ni sa i pwan gwo pat, kon léfan, ni sa i pwan pat long long long, kon jiraf ; dòt ankò pwan ti pat fin fin fin kon chouval a dyab. Sa i pa té pòté bon mannèv pa ni tan trapé, kon vètè é sèpan... Krab, li, té ay douvan-douvan, kifè i ni tan pwan pat jan i té vlé. Gadé tibwen tousa i ni ! Monkonpè té kontan toubòl­man. I mété-y ka pasé koté toutmoun, ka montré yo tout pat a-y, ka fè jé épi détwa i pa té trapé, oben èvè sa i té touvé pat ki pa té ka sanm kò a-yo, kon boukyèt ki tin pat two piti pou chaj i ka ni pou pòté... Men toupannan krab té ka fè bòdzè èvè jé pat a-y, Bondyé té ja voyé tèt ba sé bèt-la. Yo té ja chwazi ki gwo, ki piti, ki bèl, ki lèd, ki long... tout kalité tèt, jan yo té pé touvé... Lè krab foré douvan pou i té pwan on tèt, i té ja two ta, tèt té ja fin... Yo di-y:
- A pa kouyon ou té ka fè padavwa ou ni onlo pat ! Eben ou pwan dévenn pou tèt !
Krab èché toupatou, men i pa jwenn menm on ti rèstan tèt moun pa té vlé !... Apwé, Bondyé voyé zékal, kyé, plim... é dot biten ankò. A pa pou krab ! I té hont, i té ka kaché-y an tout ti tou.
Konm Bondyé sé on bon papa, i vwè krab fouben fè on kou é ko a-y tèlman i an kapilotad, i kriyé-y é i di-y :
- Monfi, fò ou say kontanté-w èvè sa ou ni... Mi, an ka vwè ou konsa ou anvi mò pas ou pa ni tèt. An ka ba-w dé zyé asi kòfò a-w, dé­mèwdé-w èvè sa épi dé mòdan a-w. Kaché-w é... viv ti viv a-w...
Dèpi jou-lasa... zòt konnèt rèstan, an pa'a di plis, avan an pèd tèt an mwen...

An bout !

Jo Clémence , Sé timoun-la annou jwé, Edtions La Bruyère, 1995