www.volcreole.com Le forum de discussion des Dom-Tom ! Guadeloupe, Martinique, Guyane, Réunion St Pierre et Miquelon, Mayotte, Polynésie, Wallis et Futuna, ...
Posté le: 01 Jan 2004 22:44 Sujet du message: Sa moun ékri an Kréyol antan lontan. XIII An Kont Gwadloup
Répons de Sanahell : lapo bwa, Lékos.
On lot piti avan zot alé dòmi.
Touvé mwen.
An sé on moun. An ni tèt, an ni kò, an ni pyé.
Tèt an mwen, sé on koté zo pé pwan dlo.
Kò an mwen, sé sa charétyé ka di bèf pou fè yo rété.
Pyé an mwen, sé on nèspèd-kalité lenj moun ka mété, pito lè yo fwèt oben si yo malad.
Mwenmenm, an ja di sa, an sé on moun ka viv o Zantiy, é dot koté ankò...
Aki mwen ?
Genre: Homme Inscrit le: 06 Jan 2003 Sujets: 281 Messages: 6562 Localisation: paris
Posté le: 02 Jan 2004 15:33 Sujet du message: Sa moun ékri an Kréyol antan lontan. XIII An Kont Gwadloup
épi créole la pa ni bizouin écri pou nou sonjé tout bagay la ja écri an mizik nou an parol nou an lè manniè agi nou... _________________ Vous n'êtes pas responsable de la tête que vous avez mais vous êtes responsable de la tête que vous faites....
Posté le: 02 Jan 2004 22:19 Sujet du message: Sa moun ékri an Kréyol antan lontan. XIII An Kont Gwadloup
Koutcha a écrit:
Répons de Sanahell : lapo bwa, Lékos.
On lot piti avan zot alé dòmi.
Touvé mwen.
An sé on moun. An ni tèt, an ni kò, an ni pyé.
Tèt an mwen, sé on koté zo pé pwan dlo.
Kò an mwen, sé sa charétyé ka di bèf pou fè yo rété.
Pyé an mwen, sé on nèspèd-kalité lenj moun ka mété, pito lè yo fwèt oben si yo malad.
Mwenmenm, an ja di sa, an sé on moun ka viv o Zantiy, é dot koté ankò...
Aki mwen ?
Posté le: 02 Jan 2004 23:09 Sujet du message: Sa moun ékri an Kréyol antan lontan. XIII An Kont Gwadloup
Devinet : Enspektè Bwafes.
Ti Sonson rikoumansé rakonté sa i té ja di lapolis.
"Man té ka maché an lari-a é man té ka gadé moun pasé, lè
man wè an monm ki té ni an baton an lanmen'y vini présé-présé
paré pou ban mwen kou. A moman-tala man pran kouri.
Polisié-a wè nou kouri é i fè débouya pou trapé nou. I tjenbé mwen.
Lot boug-la di ki mwen té toudi patron'y é ki man té volé latjès-la andidan kazino-a
"Le Colibri D'or".
Sa pa té pé mwen ki té pé fè sa pas man pa té janmen alé
kazino-tala épi man té janmen tann palé di'y avan.
Man ritounen épi polisié-a an kazino-a é yonndé klian di sé té pétet mwen ki té fè sa, mé yo pa té sèten di sa."
Lè enspektè Bwafes fini li dépozision-an, i déklaré :
"Ti Sonson sé an malfété. Sé li ki fè sa, man sèten".
Ki manniè enspekyè-a fè pou sav sa ?
Posté le: 04 Jan 2004 15:52 Sujet du message: Sa moun ékri an Kréyol antan lontan. XIII An Kont Gwadloup
ha man sav , boug la ka di i pa janmè alé adan kazino-a men aprè i ka di : mwen ritounen epi polisyé-a adan kazino-a ... , i té ja alé alò, sakré ti mantè!
Posté le: 15 Mar 2004 23:14 Sujet du message: Sa moun ékri an Kréyol antan lontan. XIII An Kont Gwadloup
Sa ka fè nanni nannan moun ka ékri an kréyol,
mé nou pa ka touvé adan libréri sé teks-la ki sòti ni
senkan, dizan, ventan, trantan...
E menm an bibliotek sa pé red pou trouvé yo.
Jòdi lendi 15 mas 2004, mi an kont Lagwadloup.
Man chanjé lotograf teks-la. Man mantjé'y épi létid liméro 2 GEREC-F. Sé
lotograf Kaspes Kréyol la.
Tansion tesk-tala pa lib. I ni an met...
Aprésyé'y !
ZANBA E LAPEN LACHAS...(Sé Jo Clémence ki ka rakonté sa.)
Mézanmi tim tim ! ...
Tout moun réponn "bwa sek !"
E rété kouté.
An kay palé zot dè konpè Zanba, é konpè Lapen
Lè yo té lachas.
An pé ké noz mandé zot si zot konnet dé konpè-lasa !
Pa tini pon moun ozantiy ki poko tann palé dè yo.
Hay chien, men bay zo a'y !
Sé pou sa fo mwen di zot kè konpè zanba sé té on nesped
chanpion adan zafè a lachas-la.
Misié té bon menm, ki avè fizi, ki avè flech,
Ki avè jespom, ki avè roch.
I té vizé toubolman.
Lè i té tiré, i pa té ka giè raté.
(Sé konsa on jou i té tjouyé on foumi-wouj ki té ka
mòdé bout a zorey a madanm a'y.
I té rété a tranndé met.
I té tiré avè fizi a'y é i pa té menm blésé madanm-la ! )
Lapen, li nou tout savé sé an blag, an kouyonnaj i fo !
Dèpi tjek tan, zafè a Lapen té ka on jan malmaché.
Jaden a'y pa té ka pòté é i té ka mal manjé padavwa, i pa
té ni pon viann an kaz-la.
Kom i té sav Zanba sé on met-a-mangnok adan lachas,
I di an kè a'y "sèten Zanba tini viann ! Fo mwen vwè pòté on
mannev pou mwen pé manjé viann a'y".
Monboug alé aka Zanba :
- Bien bonjou konpè Zanba !
Yo di mwen ou sé on met chasè.
E mwen menm, an sé pli gran chasè ki tini !
An poko jen touvé pli fò ki mwen !
Lot jou mwen antré an bwa chasé.
Pli vit ki batzié, an té oblijé refizé tjouyé jibié ankò.
Sé yo menm, lé zozio, lé zannimo ki té ka vin di mwen :
"Tjouyé mwen pou'w pé manjé, Misié Lapen, souplé !..."
Pou bout épi sa, konpè Zanba monchè, an sèten an pli gran chasè ki'w !
Lè i tann sa, konpè zanba pwan ri :
- Kia kia kia !... Vous Lapen ! Ou pli gran chasè ki mwen,
Mal Zanba !... Men ou fou konpè ! Pa di bétiz !
Misié Liwa ki Misié Liwa, gran chasè lion, tig, léfan, tou
bet ki tini, li menm Misié Liwa savé i pa fos an mwen pou lachas !
Ou ka kwè sé vou ti konpè Lapen ki ké pli fò ki mwen !
Awa lékonp ! Awa ! Pa jen répété sa pon jou !
Moun té ké fè jé avè'w !...
Lapen réponn :
- Mwen menm ! Ou pé ri tout ri a'w, an sèten an méyè ki'w !
Dayè, sé pou sa an vin koté'w. An paré a fè on payé avè'w !
Nou ka payé sa ou vlé : An sèten nou ka pati an bwa ansanm avè
fizi an nou é an ka rètouné avè plis jibié ki'w !
Zanba réponn :
- Bon, konpè, sé sé sa ou vlé, pa ni pwoblem !
Nou pa bizwen payé pas an seten gangné. An nou rantré an bwa !
An nou chasé bet é nou ka rètrouvé a senkè kotésit.
Sila ki ni plis jibié-la gangné !
Lapen di "Dakò "
Yo rantré an bwa avè fizi é sak a yo...
Zanba vwè an vol zozio. I tiré "vidim !" i tjouyé twa on sel kou.
Lapen tiré osi men i pa pran hak !...
Yo kontinié maché é, pliziè fwa Zanba tiré asi bet é i pa jen raté
Lapen, li, chak fwa i tiré sé pié bwa i ka trapé oben sé van i ka tjouyé.
On lè, lapen di zanba :
- Gadé, konpè ! Nou ja bien chasé. Sak a'w jan bien plen,
E nou tou lé dé nou tibwen las. An nou pwan on ti kanpe !
Zanba gadé sak vid a Lapen é i réponn :
- Dakò ! An tout jan ou ka vwè ou ja ped konba !
Sak an mwen ja plen é ou poko tjouyé pa menm on foumi rouj !
- Pa okipé'w di sa konpè ! Lè an mwen ké rivé,
An ké ni tout jibié an vlé :... Men vou ki ja tin onlo,
An nou woti dé-o-twa pou nou manjé toujou
Dakò konpè ! Pa lakantité an tini, a pa yonn-dé
Ki ké anpéché mwen gangné'w !
Yo sizé anba o gwo pié mango. Zanba plimé dé zozio.
Lapen limé on difé é i koumansé woti zozio.
Toupannan zozio ka woti, lapen di :
- Konpè ! Nou ké manjé sé bet-lasa san pwan on lagout
Douvan é san bwè ti bwen diven dèyè alos ?
Alé vitman akaz a'w chèché dé boutey !
An ka pwéparé manjé-la toujou.
Kité sak a'w, an ké véyé'y ba'w é kouri vit
Zanba pati vant atè, alé chèché bwè.
Mézanmi krik !... Zot ja tou konpwann sa ki rivé ?
Lè zanba routouné, i pa touvé Lapen ! Ni sak a'y,
ni pon zozio woti, ni ayen, hak, henkenchien !
Lapen té pati avè tout !
Zanba mété'y a hanni kon vié chouval a malodan !
I touné, i viré, i maté, i wouklé !
Men Lapen té ja bien pati.
Zanba pati alakous aka Lapen. I touvé Man Lapen
Ka pilé dé grenn mayis adan an vié pilon.
- Man Lapen oti mari a'w ?
- Ay konpè ! Ou ka mandé mwen pou Lapen !
Zot pati ansanm bomaten !
- Ou sèten ou poko vwè'y viré ?
- Mé non konpè Zanba ! O kontrè an ka bien atann li
Pou vwè ka i ké pòté pou mwen manjé avè mayis-la an ka pilé la!
Zanba rantré an kaz-la, pasé pa dèyè, gadé anho, gadé anba.
I pa vwè Lapen. I pati anmegdé kon kong !
An chimen i kontré Lous, on bon zanmi a'y.
- Hé konpè Lous ! Ou pa vwè Lapen ?
- Mé wi konpè, an sòti vwè Lapen obò riviè-la sizé ka
manjé enpé zozio woti. Okontrè sé akaz a'y an kalé
pòté enpé viann i voyé ba madanm a'y.
Kouman i voyé'w pòté viann ba madanm a'y é li
menm ka manjé obò riviè ! Es ou sav sé viann an mwen ?
Sé mwen ki tjouyé tout jibié-lasa !
- Wi konpè ! An sav sa paskè Lapen di mwen sa !
I di mwen sé'w ki bay li.
Ka ou di ? Sé mwen ki bay viann ? Men boug-lasa fou oben i toktok ?
Sé volé misié volé biten an mwen !
An k'alé fè'y rann mwen tout onfwa !
E pou koumansé ban mwen sa ki an men a'w !
- A ! mon konpè ! Ou pé règlé kont a'w avè Lapen si'w vlé,
men ou pé ké opozé mwen pòté dé moso viann ba malérèz-la !
E konpè Lous kontinié chimen a'y, i alé ba Man Lapen viann-la.
Konpè Zanba ay obò riviè é i touvé Lapen bien enstalé
Alez kon blez si on falez. I varé'y :
- Misié Lapen ! Ou volé zozio an mwen !
- Mé mon konpè ! An pa volé hak !
Dayè si an té volé an té ké ay kaché mwen !
Konpwann mwen bien : Nou té payé an té ké tjouyé plis
jibié ki'w. Bon !
An pa tjouyé ayen, alos ou gangné payé-la ! Dakò !
Men ka nou té payé ? Ayen !... Epi nou pa té konvini ayen pou manjé viann-la !
Ou ja gangné payé a'w, ou pa oblijé manjé sé jibié la anko, dayè !
Konpè Zanba té anmegdé toubolman, men an menm
ditan, i té bien kontan tandé Lapen di'y i gangné payé-la.
Anfinaldikont, i kalmè'y é i pati ay di tout moun i gangné Lapen !
Ka'w vlé fè ?
On kouyon toujou kouyon, pa vwé ?...
Lapen, li sa i té bizwen sé té manjé viann, é zot vwè mézanmi, sé sa i fè !
Yé krik !... I bout !
Jo Clémence.
Fouyota N°7 Avril 1985
Bulletin publié par L'association culturelle pour la promotion
et la diffusion des études créoles en Guadeloupe.
Toutes les heures sont au format GMT + 1 Heure Aller à la page Précédente1, 2, 3, ... 18, 19, 20Suivante
Page 2 sur 20
Vous ne pouvez pas poster de nouveaux sujets dans ce forum Vous ne pouvez pas répondre aux sujets dans ce forum Vous ne pouvez pas éditer vos messages dans ce forum Vous ne pouvez pas supprimer vos messages dans ce forum Vous ne pouvez pas voter dans les sondages de ce forum
Publier ce sujet sur Facebook
